A TUTTI QUELLI CHE SI AMANO, IL MIO REGALO DI SAN VALENTINO

CHIST’AMMORE

Chist’ammore

Accussì arraggiuso

Accussì delicato

Accussì dóce

Accussì scunfurtato

Chist’ammore

Bello comme ’o juorno

’Nfamo comme ’o tiempo                               

Quanno fa maletiempo

Chist’ammore accussì overo

Chist’ammorre accussì bello

Accussì felice

Accussì allero

Accussì arriffabile

  

Ca tremma ’e paura comme a nu ninno dint’ ’o scuro

Accussì sicuro ’e isso

Comme a n’ommo abbasato int’ ’a nuttata

Chist’ammore ca metteva paura a ll’ate

Ca ’e faceva parlà’

Ca ’e faceva addeventà’ janche janche

Chist’ammore tenuto d’uocchio

Pecché nuje ’o tenévemo d’uocchio

Secutato sfreggiato scarpesato jettato niàto scurdato

Pecché nuje l’avimmo secutato sfreggiato scarpesato jettato

Niàto scurdato

Chist’ammore chìno chìno

Ancora accussì vivo

E vasato d’ ’o sole

È ’o tujo

È ’o mio

È chillo ca è stato

’Sta cosa sempe nova

E ca nun è maje cagnata

Verace comme a ’na chianta                     

Tremmante comme a n’auciello

Càvera e viva comme a ll’està

Nuje putimmo tutt’ ’e dduje                                  

Jì e venì’

Nuje putimmo scurdà’

E po’ nce addurmì n’ata vota

Scétarce suffrì’ addeventà’ viecchie

E po’ piglià’  suonno

Sunnà’ ’a morte                         

Nce scetà’ fa’ na resella e rìrere

E turnà’ a essere giùvene

Ll’ammore nuosto rummane llà

Canzirro

Vivo comme ’o gulìo

’Nfamo comme ’a memoria

Abbunàto comme ’a nustalgia

Doce comme ’o ricordo

Friddo comme ’o màrmulo

Bello come ’o juorno

Dilicato comme a nu nennillo

Nce guarda cu nu pizzo a rriso

E nce parla senza dìcere niente

E io ’o sto a sentì’ tremmanno

E allucco

Allucco pe’ te

Allucco pe’ me

Te sùppreco

Pe’ te pe’ me pe’ tutte chelle ca se vonno bene

E che se so’ vulute bene

I’ nce l’allucco

Pe’ te pe’ me e pe’ tutte ll’ate

Ca manco ’e saccio

Rummane llà

Addò staie

Llà addò stive na vota

Resta llà

Nun te mòvere

Nun te ne jì

Nuje ca simmo vulute bene

Nuje t’avimmo scurdato

Tu nun te scurdà’ ’e nuje

Nun ténevemo ca a te ncopp’ a ’sta terra

Nun ce lassà’ a murì’ ’e fridde

Luntano sempe cchiù luntano

E nun ’mporta addò

Dàcce nu segno ’e vita

Assaie cchiù tarde addò sta nu spìcolo ’e vuosco

Dint’ ’a furesta d’ ’a memoria

Aìzete all’intrasatto

Stiénnece ’a mano

E pòrtace ’nsarvamiento.

                                                 Jacques Prévert

(© traduzione di Sigismondo Nastri)